ALINIPA KUMBI, ALEKUPA KITI

Ujapo kwasika, mtulivu uwe

Alipenda Rabuka, nilivyo niwe

Ikujiapo fanaka, adilika wewe

Alinipa kumbi, alekupa Kiti

Kazi niitendayo, yanikimu daima

Naipenda hiyo, iwapo ni rukwama

Yangu kazi hiyo, wewe ipe heshima

Alinipa kumbi, alekupa Kiti

Manani kanipa, hii yangu sura

We heshima nipa, niwapo chotara

Kama baya kanipa, nawe nzuri sura

Alinipa kumbi, alekupa Kiti

Nikaapo pale, paheshimu wewe

Kibadangu kile, chakuhusu ni we?

Shukuru Molale, kwa ulipo wewe

Alinipa kumbi, alekupa Kiti

Hata kama mie, sikupata elimu

Si penzi langu wee, kut’ona mwalimu

Tulivyo tukae, sote binadamu

Alinipa kumbi, alekupa kiti

Kafanya duniani, tufautiane

Lengole Manani, zoteni Karne

Sote duniani, tushirikiane

Alinipa kumbi, alekupa Kiti.